1867 செப்டம்பர் 14. உலகின் சமூக, பொருளாதாரச் சிந்தனை வரலாற்றில் ஒரு முக்கியமான நாள். கார்ல் மார்க்ஸின் மகத்தான படைப்பான ‘மூலதனம்’ (Das Kapital) முதல் தொகுதி அன்றுதான் வெளியானது. வில்ஹெல்ம் வோல்ஃப் அவர்களுக்கு அர்ப்பணிக்கப்பட்ட இந்த நூல், வெறும் பொருளாதார நூல் அல்ல; முதலாளித்துவ சமூக அமைப்பின் உள்ளார்ந்த இயக்கத்தையும், அதன் முரண்பாடுகளையும் அறிவியல்பூர்வமாகத் திறந்து காட்டிய வரலாற்றுச் சான்றாகும்.
மார்க்ஸ் ‘மூலதனம்’ நூலை எழுதும்போது முதலாளித்துவம் தனது ஆரம்ப வளர்ச்சிக் கட்டத்தில் இருந்தது. தொழிற்புரட்சி உற்பத்திச் சக்திகளைப் பெருக்கியிருந்தாலும், அதன் மறுபுறத்தில் தொழிலாளர்களின் நீண்ட வேலைநேரம், குறைந்த கூலி, குழந்தைத் தொழில், பாதுகாப்பற்ற பணிச்சூழல், வறுமை ஆகியவை தீவிரமாக இருந்தன. முதலாளித்துவம் உருவாக்கும் செல்வத்தின் பின்னால் யாருடைய உழைப்பு இருக்கிறது என்ற அடிப்படைக் கேள்வியை மார்க்ஸ் எழுப்பினார்.
அவரது ஆய்வின் மையத்தில் ‘உபரி மதிப்பு’ என்ற கருத்து உள்ளது. தொழிலாளி தனது உழைப்புச் சக்தியை விற்று கூலி பெறுகிறான். ஆனால் அவன் உருவாக்கும் மதிப்பு, அவனுக்குக் கிடைக்கும் கூலியை விட அதிகமானது. அந்த உபரி மதிப்பை முதலாளி கைப்பற்றுவதன் மூலமே மூலதனச் சேர்க்கை நடைபெறுகிறது. இதுவே சுரண்டலின் பொருளாதார அடித்தளத்தை மார்க்ஸ் வெளிப்படுத்திய விதமாகும்.
மூலதனம் தன்னைத்தானே பெருக்கிக் கொள்ளும் இயக்கத்தை மார்க்ஸ் ‘மூலதனச் சேர்க்கை’ மூலம் விளக்குகிறார். போட்டி, தொழில்நுட்ப வளர்ச்சி, உற்பத்தித் திறன் அதிகரிப்பு ஆகியவை முதலாளிகளை மேலும் மேலும் முதலீடு செய்யத் தூண்டுகின்றன. இதன் விளைவாக உற்பத்தி சமூகமயமாகும்; ஆனால் அதன் பலன்கள் தனியார் உடைமையாகக் குவிக்கப்படுகின்றன. இதுவே முதலாளித்துவத்தின் அடிப்படை முரண்பாடுகளில் ஒன்று.
159 ஆண்டுகளுக்குப் பிறகு, ‘மூலதனம்’ மீண்டும் ஏன் முக்கியமாகிறது? உலக முதலாளித்துவம் இன்று முன்னெப்போதையும்விட அதிகமாக நிதி மயமாக்கப்பட்டுள்ளது. பங்குச் சந்தைகள், வங்கிகள், முதலீட்டு நிதிகள், கடன் பொருளாதாரம், ஊக மூலதனம் ஆகியவை உலகப் பொருளாதாரத்தை ஆழமாகப் பாதிக்கின்றன. ஒரு நாட்டின் பொருளாதார முடிவுகளைக்கூட சர்வதேச நிதி இயக்கங்கள் தீர்மானிக்கும் நிலை உருவாகியுள்ளது.
அதேவேளை, உலகின் ஒரு சிறிய பகுதியினரிடம் செல்வம் குவியும் வேகம் அதிகரித்துக் கொண்டிருக்கிறது. மறுபுறம், வேலைவாய்ப்பின் பாதுகாப்பின்மை, ஒப்பந்தத் தொழில், ‘கிக்’ பொருளாதாரம், குறைந்த கூலி, சமூகப் பாதுகாப்பு குறைதல் போன்றவை உழைக்கும் மக்களின் வாழ்வை நெருக்கடிக்குள் தள்ளுகின்றன. செயற்கை நுண்ணறிவு மற்றும் தானியங்கி தொழில்நுட்ப வளர்ச்சி உற்பத்தித் திறனை அதிகரித்தாலும், அதன் பலன் யாருக்குச் செல்கிறது என்ற கேள்வி மேலும் முக்கியமாகிறது.
இந்தியாவிலும் தனியார்மயமாக்கல், தாராளமயமாக்கல், பெருநிறுவனக் குவிப்பு, இயற்கை வளங்களின் வணிகமயமாக்கல் ஆகியவற்றின் பின்னணியில் ‘மூலதனம்’ எழுப்பிய கேள்விகள் இன்னும் உயிர்ப்புடன் உள்ளன.
மார்க்ஸின் சிறப்பு முதலாளித்துவத்தை வெறுமனே விமர்சித்ததில் இல்லை. அது எவ்வாறு இயங்குகிறது, எவ்வாறு செல்வத்தை உருவாக்குகிறது, அதே நேரத்தில் எவ்வாறு சுரண்டலையும், சமத்துவமின்மையையும் உருவாக்குகிறது என்பதை அறிவியல் முறையில் ஆராய்ந்து வெளிப்படுத்தியதில்தான் உள்ளது.
எனவே, ‘மூலதனம்’ ஒரு கடந்தகால நூல் அல்ல. முதலாளித்துவத்தின் புதிய வடிவங்களைப் புரிந்துகொள்வதற்கான உயிருள்ள சிந்தனைக் கருவி. உலகப் பொருளாதார நெருக்கடிகள், அதிகரிக்கும் சமத்துவமின்மை, போர்கள், ஏகாதிபத்தியப் போட்டிகள் ஆகியவற்றை எதிர்கொள்ளும் இக்காலத்தில், மார்க்ஸின் ‘மூலதனத்தை’ மீண்டும் வாசிப்பது வரலாற்றை நினைவுகூர்வதற்காக அல்ல; நிகழ்காலத்தைப் புரிந்துகொண்டு எதிர்காலத்தை மாற்றுவதற்காக.
